Семен Данилов оскуолаҕа

Манна Саха сирин учууталлара саха народнай поэта Сэмэн Петрович Данилов олоҕун, айар үлэтин оскуолаҕа үөрэтиигэ сыһыаннаах үлэлэрэ киирдилэр

Семен Данилов ох тыллара

Сэмэн Петрович Данилов хоһоонноругар, тыл этиилэригэр, ыстатыйаларыгар сыһыаннаах ох тыллар, бэргэн этиилэр киирдилэр.

БИКИПИЭДЬИЙЭТТЭН

Семен Петрович Данилов (20.03.1917—27.11.1978) — саха норуодунай поэта, прозаик, тылбаасчыт, литератураны ырытааччы, ССРС суруйааччыларын Сойууһун чилиэнэ.

 

Олоҕун олуктара

1917 сыл кулун тутар 20 Арҕаа Хаҥалас улууһугар, Мытаах нэһилиэгэр, Бор алааска төрөөбүт. Бор бастакы сүһүөх оскуолатын бүтэрэн, салгыы Бэрдьигэстээх 7 кылаастаах оскуолатын бүтэрбитэ. Колхуоска биригэдьииринэн, булчутунан, норуот суутугар суруксутунан, хомсомуол райкомун инструкторынан үлэлээбитэ.

Дьокуускайга педагогика институтун бүтэрбитэ, кэлин Москубаҕа М. Горькай аатынан Литература институтун иһинээҕи Үрдүкү литература куурустарыгар үөрэммитэ. Оскуолаларга, техникумнарга нуучча тылын уонна литературатын биэрбитэ, сэттэ сыл Дьокуускайдааҕы педагогика институтугар саха литературатын устуоруйатын куурсун биэрбитэ. 50-с сылларга «саха былыргытыгар, олоҥхоҕо, фольклорга аһара хасыһар» диэн омугумсуйууга буруйданан үлэтиттэн ууратыллыбыта[1]. Онтон 1961 с. саҕалаан өлүөр дылы Саха Сирин суруйааччыларын Сойууһун бырабылыанньатын бэрэссэдээтэлинэн үлэлээбитэ.

1978 сыллаахха сэтинньи 27 күнүгэр өлбүтэ.

 

Айар үлэтэ

Сэмэн Данилов 1937 сыллаахтан айымньыларын бэчээттээн барбыта. «Саха үҥкүүтэ» — аатырбыт хоһооно ырыа буолбута. Бу хоһоон саха бастакы балеринатыгар Евдокия Степановаҕа анаммыта. Ол гынан баран Сэмэн Данилов литератор быһыытынан диапазона олус киэҥ: хаһыат публицистическэй хоһооно уонна маассабай ырыа, фельетон уонна көрдөөх хоһоон, оҕолорго анаммыт хоһооннор, кэпсээннэр, литературнай-критическэй ыстатыйалар, норуот айымньыларын поэтическай чочуйуу, поэмалар.

А. Пушкин, М. Лермонтов, А. Мицкевич, Т. Шевченко, И. Крылов, М. Горькай, А. Гайдар айымньыларын сахалыы тылбаастаабыта.